У мінулую суботу (27 ліпеня бягучага года) у вёсках Мазалаўскага сельскага Савета прайшлі мерапрыемствы ў межах творчага марафона “Тут радзімы маёй пачатак”, ініцыятарамі правядзення якога выступілі мясцовыя культработнікі. Дадзены марафон стаў чарговым мерапрыемствам, што праводзяць работнікі Дома культуры ў рамках Года малой радзімы.
Старт творчай дзеі дала акцыя па добраўпарадкаванні аграгарадка Мазалава, у якой прынялі ўдзел работнікі ўстаноў культуры і ўдзельнікі калектываў мастацкай творчасці. Чараду мерапрыемстваў працягнулі свята вёскі Сакольнікі, выязныя канцэрты ў вёсках Хайсы і Буяны.
Добры настрой жыхарам і гасцям населеных пунктаў падарылі ўдзельнікі народнага ансамбля народнай песні і музыкі “Вераснянка”, народнага жаночага клуба “Залаты ўзрост” і тэатральнага калектыва “Вобраз”. Кожнае мерапрыемства гэтага дня прайшло па сваім цікавым сцэнарыі.
У кожнай вёсцы, куды завіталі мазалаўскія артысты, іх віталі не толькі шчырымі апладысментамі, але і кветкамі, і пачастункамі: калодзежнай вадой – у Сакольніках, смачнай выпечкай – у Хайсах, прыгожымі кветкамі – у Буянах. А гэта значыць, што артыстаў чакаюць і рыхтуюцца да іх сустрэчы, як першыя – да сустрэчы з жыхарамі вёсак.
У гэты ж дзень можна было наведаць выставу дзіцячых малюнкаў у Мазалаўскім СДК, а таксама экскурсію “Сцяжынкамі Аляксея Сапунова”.© Авторское право «Витьбичи». Гиперссылка на источник обязательна.
